கள்ளக்குறிச்சி மற்றும் விழுப்புரம் மாவட்டங்களில் சென்னை, விதைச் சான்று மற்றும் அங்ககச்சான்று இயக்குநர் ஆய்வு

விழுப்புரம், ஜூலை 13

கள்ளக்குறிச்சி மற்றும் விழுப்புரம் மாவட்டங்களில் சென்னை, விதைச்சான்று மற்றும் அங்ககச்சான்று இயக்குநர் ஜி.வளர்மதி, விதைச்சான்று மற்றும் அங்ககச்சான்று திட்டப்பணிகளை ஆய்வு செய்தார்.

கள்ளக்குறிச்சி மாவட்டம் உளுந்தூர்பேட்டையில் உள்ள தனியார் விதை விற்பனை நிலையத்தில் ஆய்வு மேற்கொண்ட அவர் கொள்முதல் செய்யப்படும் விதை குவியல்களுக்கான கொள்முதல் பட்டியல், பகுப்பாய்வு அறிக்கை நகல், பதிவுச்சான்று ஆகிய ஆவணங்கள் பெறப்பட்டு, இருப்பு பதிவேடு மற்றும் விற்பனை பட்டியல் முறைப்படி பராமரிக்க வேண்டும் என அறிவுறுத்தினார். விதைக்குவியல் உண்மை இருப்பும் பதிவேட்டின் இருப்பும் சரியாக இருக்க வேண்டும் என கூறினார். பருவத்திற்கேற்ற தரமான, சான்று பெற்ற விதைகளை கொள்முதல் செய்து விவசாயிகளுக்கு வழங்குமாறு தெரிவித்தார். இதையடுத்து, திருவெண்ணெய்நல்லூர் வட்டாரம், சித்தானங்கூர் கிராமத்தில் அமைக்கப்பட்டுள்ள 1.91 ஏக்கர் கம்பு தனசக்தி சா.நி 1 விதைப்பண்ணையை ஆய்வு செய்த அவர் விதை உற்பத்தியை பெருக்க தேவையான தொழில்நுட்பங்களை விவசாயிக்கு எடுத்துக்கூறினார்.

பின்னர் விழுப்புரம், வேளாண்மை இணை இயக்குநர் அலுவலக வளாகத்தில் அமைந்துள்ள விதைச்சான்று, விதை ஆய்வு மற்றும் விதை பரிசோதனை நிலைய அலுவலர்களுக்கு ஆய்வுக்கூட்டம் நடத்தி, தரமான விதைகளை விவசாயிகளுக்கு வழங்கிடத் தேவையான அனைத்து நடைமுறைகளையும் கடைப்பிடித்து செயலாற்றுமாறு அறிவுரைகளை வழங்கினார். இதனைத் தொடர்ந்து, விதை பரிசோதனை நிலையத்தைப் பார்வையிட்டார். இந்த ஆய்வின்போது விழுப்புரம், வேளாண்மை இணை இயக்குநர், எஸ்.சண்முகம், வேளாண்மை துணை இயக்குநர் (திட்டம்) இரா.பெரியசாமி, விழுப்புரம், விதை ஆய்வு துணை இயக்குநர், இரா.சீனிவாசன், விதைச்சான்று உதவி இயக்குநர், க.கதிரேசன், விதை ஆய்வாளர்கள் இரா.ஜோதிமணி, ஆ.நடராஜன், விதைச்சான்று அலுவலர்கள் கருணாநிதி, க.விஜயா, விதை பரிசோதனை அலுவலர்கள் இ.சந்தோஷ் குமார், பு.கீதா ஆகியோர் உடன் இருந்தனர்.