January 23, 2022

ValarTamil Publications

AgriDoctor & Kaalaimani

நெல் பயிர் பாதுகாப்பு

குருத்துப் பூச்சி
பூச்சி விபரம்

அந்து பூச்சிகள் நெல் தோகையின் நுனி பகுதியில் முட்டைகளை குவியலாக இட்டு மஞ்சள் நிற பஞ்சு போன்ற உரோமங்களால் மூடப்பட்டிருக்கும். ஒவ்வொரு பெண் பூச்சியும் 50 முதல் 80 முட்டைகள் கொண்ட 2 முதல் 3 குவியல்களை இடும். முட்டை பருவம் 5 முதல் 8 நாட்கள். முட்டையிலிருந்து வரும் இளம் புழுக்கள் வெள்ளை நிறத்திலும், வளர்ச்சியடைந்த புழுக்கள் மஞ்சள் நிறத்தில் (மஞ்சள் நிற தண்டு துளைப்பான்) இளஞ்சிவப்பு (இளஞ்சிவப்பு தண்டு துளைப்பான்) நிறத்திலும் காணப்படும் புழு பருவம் 33 முதல் 40 நாட்கள். நன்றாக வளர்ச்சியடைந்த புழுக்கள் தண்டின் துவாரத்தினுள் இளஞ்சிவப்பு நிறத்தில் கூடு கட்டி கூட்டுப் புழுவாக மாறுகிறது. கூட்டுப்புழு பருவம் 6 முதல் 10 நாட்கள். வருடத்திற்கு 4 தலைமுறைகள் தோன்றுகின்றன. அந்து பூச்சிகள் 8 கி.மீ வரை பறக்கும் தன்மையுடையவை.

தாக்குதல் அறிகுறிகள்
தாக்கப்பட்ட இளம் பயிரில், நடுக்குருத்து காய்ந்திருக்கும். குருத்தை பிடித்து இழுத்தால் கையோடு வந்துவிடும். கதிர் வெளிவரும் பருவத்தில் இதன் தாக்குதல் இருந்தால் வரும் கதிர் “வெண்கதிராக” இருக்கும். அக்டோபர் முதல் டிசம்பர் வரை நிலவும் குறைந்த பகல் நேர வெப்பநிலை, அதிகமான ஈரப்பதம், குளிர்ந்த சீதோஷ்ண நிலை இப்பூச்சிகளின் அதிக பெருக்கத்திற்கு காரணமாகும்.

பொருளாதார சேதநிலை
· நாற்றங்கால் – 2 முட்டை குவியல்கள் / ச.மீ
· வளர்ச்சி பருவம் – 10 சத நடுக்குருத்து காய்ந்திருத்தல்
· கதிர் பருவம் – 2 சத வெண்கதிர்

தடுப்பு முறைகள்

  1. முட்டை குவியல்களை சேகரித்து அழித்தல்.
  2. இரவு நேரங்களில் விளக்கு பொறி வைத்து அந்துப் பூச்சிகளை கவர்ந்திழுத்து அழித்தல்.
  3. இனக்கவர்ச்சி பொறி 5 எண்கள் / ஏக்கர் அளவில் வைத்து ஆண்அந்து பூச்சிகளை கவர்ந்திழுத்து அழித்தல்.
  4. அந்து பூச்சிகள் நடமாட்டம் இருக்கும் போது டிரைக்கோ கிரம்மா ஜப்பானிகம் முட்டை ஒட்டுண்ணிகளை ஏக்கருக்கு 2 சிசி வீதம் வயலில் விட வேண்டும் – 1 வார இடைவெளியில் 3 முறை இட வேண்டும்.
  5. பொருளாதார சேத நிலைக்கு மேல் தாக்குதல் இருந்தால் கீழ்கண்ட பூச்சி கொல்லிகளில் ஏதேனும் ஒன்றினை ஏக்கருக்கு கைத்தெளிப்பான் – 200 லிட்டர் / விசை தெளிப்பான் 60 லிட்டர் தண்ணீரில் கலந்து தெளித்து கட்டுப்படுத்தலாம்.

§ கார்டாப் ஹைட்ரோகுளோரைடு – 50 SP 400 கிராம்
§ குளோர் ஆன்ட்ரனலிபுரோல் – 18.5 எஸ்சி 60 மி.லி.
§ புளுபென்டியமைடு – 39.35எஸ்சி 20 மி.லி
§ தயமீதாக்சம் – 25 WG 40 கிராம்
§ குளோர்பைரிபாஸ் – 20 EC 500 மி.லி

இத்தகவலை இராமநாதபுரம் மாவட்ட, விதைச்சான்று மற்றும் அங்ககச் சான்று உதவி இயக்குநர், சீ. சக்திகணேஷ் தெரிவித்தார்.

Spread the love