May 18, 2022

ValarTamil Publications

AgriDoctor & Kaalaimani

பசுந்தாள் உரப் பயிர் சாகுபடி

விருதுநகர், மே 6

பசுந்தாள் உரப் பயிர் சாகுபடி செய்து மண் வளத்தை பாதுகாக்கவும் பசுந்தாள் உரங்களை நிலங்களில் வளர்த்து மடக்கி உழுது பயிரிடுவதன் மூலம் பயிரின் உரத்தேவையை நல்ல முறையில் பயன்படுத்தலாம் என விருதுநகர் விதைச்சான்று மற்றும் அங்ககச்சான்று உதவி இயக்குநர் த.சுப்பாராஜ் தெரிவித்தார்.

இது குறித்து அவர் வெளியிட்ட செய்திக் குறிப்பில் தெரிவித்துள்ளதாவது, இரசாயன உரங்கள் இல்லாத காலத்தில் இயற்கை உரங்களை குறிப்பாக பசுந்தாள் உரங்களை வேளாண்மைக்கு விவசாயிகள் பயன்படுத்தியுள்ளனர். விவசாயிகள் உயர் விளைச்சல் ரகங்கள் பயிரிடுவதால் போதுமான அளவு இயற்கை உரங்கள் கிடைக்க வாய்ப்பில்லை. சாகுபடி செய்யக்கூடிய பயிர்களுக்கு போதுமான அளவு இயற்கை உரங்கள் எதுவும் இல்லை. ஆதனால் மண் வளம் மற்றும் சுற்றுப்புறச்சூழல் பாதிப்படைகிறது. இதனால் பயிரின் விளைச்சல் குறைந்த கொண்டே வருகிறது. இதைத் தடுக்க பசுந்தாள் உரப் பயிர்கள் இடுவதால் தழைச்சத்து மண்ணில் நிலைபடுத்துவதால் மண்ணின்வளம் பாதுகாக்கப்படுகிறது. மண்ணில் உள்ள நுண்ணுயிரிகளின் செயல்பாடுகளை ஊக்குவிக்கிறது.

பயிருக்கு தேவையான உணவுப் பொருள்கள் கிடைக்க உதவுகிறது. மண்ணின் கட்டமைப்பை சீராக்கி நீரை தேக்கி வைத்துக் கொள்ளும் திறனை ஏற்படுத்துகிறது. பயிருக்கு தேவையான சத்துக்களை மண்ணின் அடிப்பாகத்தில் இருந்து மேல் பகுதிக்கு கொண்டு வருவது மற்றும் மண் வளத்தை நீட்டிக்க பயன்படுகிறது. விவசாயிகள் தற்போது பெறக்கூடிய மழையை பயன்படுத்தி பசுந்தாள் உரப் பயிர்களைப் பயிரிடுவதன் மூலம் பயிருக்கு தேவையான இயற்கை உரங்கள் எளிதில் கிடைக்கச் செய்வதுடன் மண்வளத்தையும் பாதுகாக்க முடியும் பயிர்களை அறுவடை செய்த பிறகு தரிசாக உள்ள நிலங்களில் பசுந்தாள் உரங்ளைப் பயிர்களான சணப்பை, தக்கைபூண்டு ஆகியவற்றை ஒரு ஹெக்டேருக்கு 20 கிலோ விதை விதைத்து 40 முதல் 45 நாட்களில் மடக்கி உழுது தழை உரமாக மாவட்டத்தில் உள்ள விவசாயிகள் பயன்படுத்தலாம் என அதில் தெரிவிக்கப்பட்டுள்ளது.

Spread the love