July 25, 2021

ValarTamil Publications

AgriDoctor & Kaalaimani

முழு கொள்ளளவை எட்டும் வைகை அணை

தேனி, ஜூலை 22

தேனி மாவட்டம் ஆண்டிபட்டி அருகே அமைந்துள்ளது வைகை அணை. இந்த அணை மூலம் தேனி, திண்டுக்கல், மதுரை, சிவகங்கை, இராமநாதபுரம் ஆகிய 5 மாவட்ட மக்கள் குடிநீர் மற்றும் பாசன தேவையை பெற்று வருகின்றனர். 71 அடி உயரமுள்ள வைகை அணை நீர் மட்டம் கடந்த சில நாட்களாக பெய்து வரும் மழை காரணமாக உயர்ந்து வந்தது.

இதனால் மதுரை, திண்டுக்கல் மாவட்ட முதல் போக பாசனத்துக்காக தண்ணீர் திறக்கப்பட்டது. இதே போல் முல்லைப் பெரியாறு அணையில் இருந்தும் வைகை அணைக்கு தண்ணீர் திறக்கப்பட்டதால் அணைக்கு நீர் வரத்து அதிகரித்தது. அணையில் திறக்கப்படும் தண்ணீரின் அளவை விட வரத்து அதிகமாக உள்ளது. வியாழக்கிழமை காலை நிலவரப்படி அணையின் நீர் மட்டம் 68.44 அடியாக இருந்தது. வரத்து 1011 கன அடியாகவும், திறப்பு 769 கன அடியாகவும் இருந்தது.

இதன் காரணமாக தேனி, திண்டுக்கல், மதுரை மாவட்டத்தில் கரையோரம் உள்ள மக்களுக்கு 2ம் கட்ட வெள்ள அபாய எச்சரிக்கை விடுக்கப்பட்டுள்ளது. 69 அடியாக உயர்ந்தவுடன் உபரியாக ஆற்றில் தண்ணீர் திறக்கப்படும் என்பதால் கரையோரம் உள்ள மக்கள் பாதுகாப்புடன் இருக்குமாறு பொதுப்பணித்துறையினர் எச்சரித்துள்ளனர்.

இதே போல் 152 அடி உயரமுள்ள முல்லைப் பெரியாறு அணையின் நீர் மட்டம் 130.25 அடியாக உள்ளது. வரத்து 1315 கன அடி. திறப்பு 900 கன அடியாக உள்ளது.

Spread the love