May 17, 2022

ValarTamil Publications

AgriDoctor & Kaalaimani

விதைப் பரிசோதனையின் அவசியம்

திருநெல்வேலி, மார்ச் 15

விவசாயிகளுக்கு தேவையான இடுபொருட்களில் நல்விதை மிக முக்கியமானதாகும். நல்விதை என்பது அதிக முளைப்புதிறன், அதிக சுத்தம், குறைந்த ஈரத்தன்மை மற்றும் கலவன் இல்லாமல் இருத்தல் வேண்டும். வேளாண்மை துறையினரால் ஒவ்வொரு பயிருக்கும் சாகுபடி பரப்பில் தகுந்தவாறு சான்று பெற்ற விதைகள் விவசரியகளுக்கு வழங்கப்படுகிறது. அரசு மூலம் விநியோகம் செய்யப்படும் அனைத்து விதைகளும் சான்று பெற்ற விதைகளாகும். திருநெல்வேலி விதைப்பரிசோதனை நிலையத்தில் 3 வகையான மாதிரிகள் பரிசோதனைக்கு பெறப்படுகின்றன.

சான்று விதை மாதிரி – விதைச் சான்றளிப்பு பிரிவில் பதிவு செய்து, விதைப்பண்ணையில் உற்பத்தி செய்யப்பட்ட விதைகள் விதைச்சான்று உதவி இயக்குநர் மூலம் வரப்பெறுவது.
ஆய்வாளர் விதை மாதிரி – அரசு, தனியார் விதை விற்பனை நிலையங்களில் விற்பனை செய்யப்படும் விதைகள் விதை ஆய்வாளர்களால் ஆய்வு செய்து மாதிரி எடுக்கப்பட்டு நேரிடையாக வரப்பெறுகிறது.
பணி விதை மாதிரிகள் – விவசாயிகள், உற்பத்தியாளர்கள் தாங்களாகவே தங்களது விதையின் திறனை அறிந்து கொள்ள தங்கள் விதைகளை நேரடியாக பரிசோதனைக்கு அனுப்புவதாகும்.

எனவே, விவசாயிகள் மற்றும் உற்பத்தியாளர்கள் நேரடியாக பரிசோதனைக்காக அனுப்பும் போது இணையதளம் மூலம் பதிவு செய்த பின்னர் ஒரு விதை மாதிரிக்கு ரூ.30 கட்டணம் செலுத்தி விதைத் தரத்தை அறிந்து பயிர் செய்து பயன் பெறலாம். மேலும், பயிர்களுக்கு ஏதுவான சூழ்நிலையில் விதையின் கரு முளைவிட்டு பின்னர் வளர்ச்சிக்கு அத்தியாவசியமான பாகங்கள் உருவாகி இயல்பான செடியாவதற்குரிய திறனே முளைப்புத்திறன் ஆகும். முளைப்புத்திறன் சோதனையின் போது இயல்பானது, இயல்பற்றது, கடினமானது, உயிரற்றது என 4 வகைப்படுத்தி சோதனை முடிவுகள் இணையதளம் மூலமாக SPECS மென் தளத்தின் மூலம் அறிவிக்கப்படுகிறது என்று திருநெல்வேலி விதைப்பரிசோதனை அலுவலர் ஜா.ரெனால்டாரமணி தெரிவித்தார்.

Spread the love